Kum 2016-ah chuan
Article Memory
Tunlai chu thu ziah lamah ka thatchhe riau mai a, facebook status han upadate-na tur takngial pawh hi ka ngaihtuah peih lo. Ka ngaihtuahna hi ka sawrbing hlei thei lo a ni ber. Nikum kum tawpah kha chuan kum 2014 thlîr lêtna ka ziak peih a, kum 2015 thlir letna erawh ka ziak peih ta lo. Nimahsela, nikum kan la pêl thui lo va, kumin chanchin han ziak turin 2016-ah hian ni 5 êm pawh kan la hmang bawk si lo, chuvangchuan, tuntuma ka thu ziahah pawh hian nikum lam chanchinin kumin chu a luahlân hle turah ka ngai a. Thû a hlawm tha dawn lo va, ka ziak phelh phung dawn.
Ka thu ziah apianga ka sawi hmaih theih loh chu ka hna thawhna hmun Tuisenchhuah khua hi a ni. Nikum kum khan Tuisenchhuahah ka awm kum tluan a, ka haw ve zeuh hi chu a belhkhawm pawhin ni 10 a tling âwrh chauh ang. 2014 kum tawp lam khan ka awm tan ve a, 2015 kum tawp lamah meuh chuan ka tlângnel tawh khawp mai. Nimahsela, thingtlang khaw tê tih takah tlângnêl dân tawk thiam loh chuan mi zah kai loh mai palh awl tak tur hi a ni. Sub-centre ka luah chilh mai avang hian nî tinin pisa ka kai tihna a ni mai a, sunday-ah pawh pisa ka kai tihna a nih chu. Vawi khat pawh, ka attendance report sheet-ah government holiday hi ka lo in-ziak present nual mai a ni awm a, kan pûin a hnuah meeting kan neih lehnaah a sawi chhuak a, "Government Holiday-ah pawh i present vek mai a, i tidik lo deuh a ni", mi ti a, "Government holiday chauh pawh a ni hleinem, sunday te nen lam ka present thlap mawle", ka tih chuan a ngawi ve mai a. Ka pêng thui lutuk dawn tlat mai. Chuvangchuan, inah hian ka awm tha em em a, ka lêng chhuak zen zen lo. Ka lên chhuah chânga ka chhuah khat thu min hrilh teh hian, "Chhuah tam pawh mî rêlna a tam mai mai, chubakah mî pawi te reu reu kan sawi ang, ina inkhung hian mi pawi kan sawi lo ber e". tiin ka chhang mai zel a, huatah lah chuan an la lem hlei bik lo va. Engpawh chu ni se, kakn khua angin ka en mai a, ka tlangnel tawh khawp mai. Tunah pawh phei leh vat ka chak tawh a ni.
Thingtlang nun leh khawpui nun hi a lo inthlau khawp mai a, han sawifiah sen chi pawh niin ka hre lo. A hrehawmna leh a nawmna lai a awm a, a hrehawmna lai hi chu kan hmuh tlang ruak theih mai ka ring a, a nawmna lai pakhat ka sawi duh chu intluktlanna hi a ni. An intluktlan vek lam a kawk lo va, khaw khatah chuan dinhmun leh khawsak a inang vek theih lo tih chu kan hre tho ang. Mahse, khawi hmunah pawh chhuak ila inchei em em a ngai lo va, incheina atangin chhungkaw dinhmun an inteh lo. Inkhawmnaah pawh ni se, slipper leh tshirt nen an kal mai a, rilru a pawimawh zawk tih hi an hrechiang ve a niang chu. Slipper leh kamis pawr hrep hrup hâ, thinlung erawh thianghlim em em sî bula Pathian biak chu, mi hausa nalh tliang dak hlak maia inthuam leh eiruk pawh hreh lo bula Pathian biak ai chuan a nuam dangdai ve khawp mai. Kâr tluanin tawnzau nên hun a hman theih a, bazar chhuah dawn avanga inchei kha ngai ve tawh hek lo, hahdamthlak tak a ni.
Pathian zara ka dam tluang zel a nih chuan kâr leh lam hi chuan Tuisenchhuahah ka awm leh vâng tawh ang a, mahse, nikum lama ka chin tha lo tam tak te sim ka tum ang a, inkhawm lamah pawh tan lâk hle ka tum a. Ka lo intiam vêna pakhat kha tih hlawhtlin ka tum dawn a ni. Chu thil chu han thailân kher kher pawh a ngai hranpa chuang lo va. Tûte emaw mirethei tanpuiina an theihna mual muala an tanpui thu tlangaupui te pawh kan ang mai ang tih ka hlau a ni. Chuvangchuan, ka thinlungphêk dâi diai maiah hian a rûkin ka pai ta mai ang e 😊.
Thil pakhat pawimawh em ema ka ngaih, kum 2016-a mahni insiamthat nan pawha hman ka duh a awm a, chu chu Social Networking inthununtir loh hi a ni. Khawvel a changkang tawh em em a, chêt awlsam zawk nân te, chanchinthar inhrilhhriat zung zung nan te hian social networking sites hi a tangkai em em a, mahse, kan hun tam zawk hman nana kan hmang hi a tha lo ka ti ve em em a, kan nun leh hriselna a khawih buai nasa a ni. Facebook hi 2009 kum atang khan ka khawih tan ve tawh a, 2009 atanga tûn thlenga ka social networking buaipuiina nghawng tha lo a neih chu sawi tur ka hre ta teuh mai. Chung zinga tha lo ka tih em em chu ka mit chhe tawh lutuk hi a ni. Tarmit tel lo chuan khua kan hmu hlei thei tawh lo a ni. In chhungah kan inkhung ngut ngut a, pawna kan chhuah ve chhunah rual pawl kan zei lo a, kan inkiltawih a, khawtlangah kan tlatlum lo. Kan cher tawlh tawlh a, men rei chuan chaw ei a lo tui lo va, kan dâng luap a, kan tawng tlêm êm êm a, chhungkuaah tangkaina kan nei tlem a, chhungkuaa inkawm khawm a harsa. Hêng zawng zawng hi ka tawn ngei a ni a. Midang chuan Social networking site hi an hmang thiam viau pawh a ni thei a, kei chuan ka chhiatpui a ni. Chunvangchuan, kum 2016-ah chuan facebook hi ka khawih tlêm tawh ang a, kan photography blog thlalak.com leh ka blog chiah hi buaipui bikah ka neih ang a, thu tam zawk ziah ka tum bawk ang. Facebook atanga rual pawl lovin hmaichhanah thian ka kawm tam tawh zawk bawk ang tih hi ka kumina ka hmasawnna atana ka duh ber a ni.
Ka ziak nawi nak dawn tih ka sawi lawk a, thu hlawm tha takin ka ziak thei lo. Blog ka update khat si a, thû eng emaw tal han ziah ve ka duh bawk si a, ka blog chu ni lo se hêng thu hi ka ziak ngam tawp nâng :-) . Tuisenchhuah atanga ka rawn kir leh hma zawng chu mangtha vek u leee, dam takin kan inhmu leh dawn nia 😘 .
Nih hi mawleeee
ReplyDelete:-P :-P
Delete