File Format

August 22, 2015

Thlâ i lâk dawna thil pawimawh em em chu memory card-a i thlalak in-save dân tur format thlan hi a ni. Thlalak file format hi camera-ah hi chuan chi hnihah then a ni a, chu chu JPEG leh RAW a ni. I camera hman azirin RAW format hi chu thlan tur a awm kher lo mai thei. DSLR leh a tlukpui camera-ah te hian RAW hi chu an rawn dah tel vek a ni.

JPEG

Digital camera (DSLR tiam lovin) kan hmuh tlânglawn ho hi chuan JPEG format bâk hi a keng tel lem lo va. JPEG format-a kan set chuan thlalak size len zawng kan tidanglam thei a. Chumi tangkaina chu camera-a memory card lian vak lo (entirnan, 2GB) kan hmana, thlâ lâk hnem kan duh sî hunah thlalak size kha kan set tê mai ang a, tichuan memory card-ah thlalak a leng teuh mai dawn a ni. JPEG format-a thlâ i lak chuan computer-ah eng image viewer pawh hmang la, i thlalak chu i en nghal thei mai dawn a, han sawngbâwl kual vêl a ngai hranpa lo. JPEG-a thlâ i lâk chuan i camera settings (saturation, brightness, contrast, etc) ang zel khan i thlalak pawh a lang ang a. Camera LCD-a thlalak rawn lang ang chiah khan i thlalak a rawn lang dawn a ni. Chuvang chuan JPEG-a lâk dawn chuan uluk taka camera set hmasak a ngai.

RAW

A nihna takah chuan RAW format hi chu image file pawh a ni chiah lo va. A chhan chu thlalakina camera image sensor piah lam a thlen tawh loh vang a ni. A awmzia chu camera sensor piah lama camera settings, saturation, contrast, brightness leh white balance zawng zawng khan thlalakah nghawng a nei ve tawh lo. Nimahsela, aperture leh shutter speed chuan thlalakah hnâ a thawk vek thung. Entirnan, RAW chu artui lo ni ta se, artui chu i duh angin i la siam danglam thei a, duh leh i kang thei a, duh leh i chhum thei a, duh leh i buhchiar thei. Mahse, i siam hma chuan artui hel mai a la ni. Chumi artui hel ang chu RAW hi a ni mai. Chuvangchuan, RAW-a thla i lâk chuan sâwngbawl leh a la ngai a ni. RAW format chuan duh tawka thlalak i edit theih nan a pui che a. Camera settings a inhnamhnawih ve tawh loh avang khân mit lawnga kan hmuh ang mai hian thlalak kha a lang a, thlalakah êng lutuk (over-exposed) pawh lo awm se, editing software hmangin han pawt thim deuh la, a zia ve leh mai a. JPEG-a overexposed-a i lak kha chu han pawt thim pawh ni la, a la êng vût reng dawn tho a ni. RAW-ah chuan thlalak color pawh mit lâwnga kan hmuh ang deuh thuak hi a ni. Imageviewer hrang hrang leh Photoshop hmanga RAW file hi hawn i tum chuan i thei dawn lo va, chuvangchuan, RAW converter software, Adobe Lightroom, Adobe DNG Converter, Adobe Camera Raw (hei hi photoshop-in a kengtel thin) te hi i hman a ngai dawn a ni. Lightroom hi hman a nuam ber maiin ka hria.

RAW + JPEG

Hê setting-ah hi chuan a chunga JPEG leh RAW khi memory card-ah a ruâlin a in-save a. Han sawifiah vak pawh a ngai hran lo, kan hrethiam nghal mai ang. A tangkaina chu, i thlalak zawh hnua i thla laksakte awlsam taka computer-a han entir hmasak thuak atan JPEG hi a tha a, RAW hi chu uluk leh zuala han edit duh tur dah that atan a tha ve leh bawk a, chu zawng chu a ni mai. Thlalak pakhat format hniha a in-save avang hian memory card a heh duh khawp mai.

Image Size

DSLR chinah hi chuan image size thlanna tur a awm a. Large, Medium leh Small-ah an thenhrang. I camera kha 10 megapixel a niha, Large i thlan chuan i thlalak kha 10 megapixel (3648x2736) a lian a ni ang. Chutiang tho chuan RAW-a i lâk dawnah pawh RAW+L a nih chuan Large i thlang tihna a ni a, i camera-ina a lâk fiah theih tawp khan a la dawn a ni. I memory card hman a chak vak loh chuan RAW+L-a i lak zawh veleh hian a in-save chhung nghah deuh a ngai ang, a size a len tawh em vâng a ni.

Ropuia Ralte August 22, 2015