Mizo Website Tlawhtu Ngah Zual
Tech
Mizo ṭawng hmangtu mihring kan la tam loh avang hian website te leh blog te hi han siam ve ṭhin mah ila rei tak hi kan daih thei meuh ṭhin lo. Kan thatchhiat azara kan chhunzawm peih leh tak tak loh avânga thâmral leh ta mai pawh a tam. Kan blog siam te pawh, "min chhiarsak tak tak lo" tih avanga update chhunzawm peih ta lote pawh kan awm ṭeuh ang. Diary anga kan blog hi kan ngai a nih loh chuan update rei a peihawm ngai loh. A hnuaia mizo website lâr zual ka rawn tarchhuah (government leh university chhiar tel lo hian) pawh hi mi teirei peih tena an enkawl a nih avanga tlawhtu ngah thei chauh an ni bawk.
A hnuaia ka rawn târlante hi ka hmuh dân aṭanga ka ziah a ni a. Dik hlel deuh te pawh a awm ang. Ka lo hriat fuh loh website lûn êm êm sî te pawh a lo awm mai thei bawk. Zirchianna mûmal tak nêna luch chilh ka nih bik loh avangin hriat sual ka neih chuan min khak mai ula.
Webpage screenshot ka dahna hnuaiah hian Alexa Ranking screenshot ka dah tel a. Hei hi website tlawhtu ngah leh ngah loh tehna rintlak ber pawl a ni. Creation Date, Registrar leh Hosting ka rawn dah tel bawk a, han dah lan kher phei chu a ṭûl em em pawh a ni lo. Creation Date hi an website an launch nî tihna pawh a ni kher chuang lo bawk. Registrar aṭanga Domain an lei nî a ni mai.
Ka rawn tarlan bâk hi website leh blog tam tak a awm. Mahse, la naupang tê tê an nih avangin hun a inher ve leh hlek te a nih loh chuan a kum leh lawka "This site can't be reached" inti leh mai tur han thai lan kha ka duh chiah lo a ni. Thu hmâ hi ka nei duah zêl, duh tawk ang 😌
1. inkhel.com
Registrar : GoDaddy
Hosting : Dreamhost
 |
| Alexa Ranking |
inkhel.com hi Mizo sports blog hmasa ber a ni a. Sports ngaina chuan inkhel.com hi kan hmelhriat deuh vek ang. An indin tirh aṭanga tun thleng hian an active em em a ni. Inkhel.com ah hian sports news leh article te post a ni a. Nî tin hian post thar hmuh tur a awm deuh reng a ni. News update kawngah an fakawm hle.
Nimahsela, an blog-ah hian advertisement a tam deuh hlek avang hian mit a kham lek lek ṭhin . Mahse, hei hi an sum hmuhna hnâr a nih hmel a, sawisel vak chi phei chu a ni lo. An website theme/template hian mit a la vak lo bawk a, hei ai hian han chei nalh leh deuh se chuan tlawhtute a hip leh zualin a rinawm bawk. Engpawh nî se, an theme hi mobile friendly/responsive a ni a, a ṭha thawkhat viau.
Inkhel.com hi tha thlah lova an kal zêl thei a nih chuan tun aṭanga kum 5 vêlah chuan mizo website hlawhtling ber leh hlawk ber an la ni thei ang.
2. vanglaini.org
Creation Date : 19.10.2006
Registrar : GoDaddy
Hosting : Dreamhost
Vanglaini hi chuan Mizoram a fan chhuah hneh êm avâng hian thingtlang kilkhâwra awm te kan nih lêm loh chuan hre lo pawh kan awm lo vang. Vanglaini hi daily newspaper a ni a, kum 1978 aṭang tawh khan vawiin thleng hian an la kal mar pât reng a ni. Mizo newspaper-ah chuan subscriber ngah ber an ni a. Sum la lût hnem ber pawh an nih hmêl. An chanchinbû-a advertisement aṭanga an sum hmuh ringawt pawh hian an chanchinbu print-na hi a daih hial mai thei a ni. An hlâwk tawh êm avang hian an website lamah hi chuan ads banner dah buangbar kher hi ṭûl an ti tawh lêm lo a nih hmêl.
An website-ah hian chanchinthar tlanglawn chu a chhiar theih a. Nimahsela, an sumdâwnna nghawng thei tur a nih avang hian aniang chu, an chanchinbu-a an thu thar dah leh article chhuah zawng zawng erawh a chhiar theih vek loh thung a. Thlalak pawh an dah tel ngai lo bawk. An website aṭang hian digital version-in Vanglaini hi a subscribe theih bawk a. Hei hi Mizoram pâwna awm te tân a ṭangkai hle tura ngaih a ni.
Mizorama news tarlanna website awm tawh-ah chuan news update ṭha ber an nih a rinawm. An website-ah hian javascript leh thlalak a tlêm êm avang hian a zâng a, tlawh a nuam em em a ni.
3. misual.com
Creation Date : 05.08.2005
Registrar : GoDaddy
Hosting : Godaddy
Kum 2010 hma lama internet lo hmang vê tawh ṭhin chuan misual.com hi kan hre vek hial ang. mi(sual).com hi community blog a ni a, registered user-in a duh chuan eng thû pawh post turin a submit thei a, admin ten an lo en dik hnuah mi(sual) blog-ah hian publish a ni ṭhin.
Lawrkhawm.com leh buannel.com te pawh kha mi(sual) blog nen hian a kalhmang a inang deuh reng a. Users tam vâng lai tak tak kha chuan mi(sual) leh Lawrkhawm te kha incho phûra team anga insiamin football-a han inel chang pawh an nei ṭhin. Khâ'ng lai hun khân facebook hi a la lâr lo va. Internet hmang ṭhin ṭhalai tâna inkawmhlimna chu Misual.com, lawrkhawm.com leh buannel.com te kha an ni deuh mai. Nimahsela, tunah chuan Buannel te leh Lawrkhawm te hi chu an kalpui chhunzawm an ni ta lo.
Facebook a rawn lâr tâk hnû hian misual.com pawh hi tlawhtu an awm mumal ta lutuk lo deuh a. Nimahsela, thu ṭha tak tak sâng chuang chhiar turin a la awm reng. Mizo website awm tawha zawnga post ngah ber an la ni hial ang.
A chunga ka'n târlan bâkah hian government, university, online shop leh kohhran website tlawhtu ngah tak tak an awm nawk a, mahse chû'ngho chu ka ziak tel ve ta lem lo mai. Mizoram University leh Mizoram Govt te pawh hi tlawhtu ngah zual an ni.