Landscape Photography
Photography Settings Tutorial
Thla lâk hun tha ber (Golden Hour)
Ni khat chhûnga lansdcape lâk nâna hun thlannahawm ber chu zîngkar leh tlâi hi a ni. Zingkarah chuan ni chhuah hmâ darkar chanve leh ni chhuah hnû darkar chanve hi hun tha bera ngaih a ni. Tlâiah pawh ni tlâk hmâ darkar chanve leh ni tlâk hnû darkar chanve vêl hi hun tha bera ngaih a ni leh bawk. A chhan chu ni chhuah hmâ leh ni dul lai (ni ên tak tak hma) hian photographer te duhthusam ngei maiin boruak hi a rawn eng (warm) nghulh zêl a, hlim (shadow) pawh nî a chhuah hma chuan a tlêm bakah hlim hriam kâk hi a awm ve ngai lo. Landscape thlâ lâk nâna hun tha ber hi hmun hla a nih si chuan hun hrehawm tak a ni thei a. Nimahsela, thlalak tha tak neia hlawhtling hâw tur chuan mî fâte aia i tawrh nasat ve deuh chu a ngai a ni.
Tripod
Landscape photography-ah chuan tripod leh camera hi a tangkai dân a inchen reng. Tripod i hmang peih lo a nih chuan landscape photographer-ah inchhâl ve lo hial rawh. Landscape photography-a i tui a nih rau rau phei chuan tripod man tlâwm tak leh hmantlak mang loh chu lei buai duh lo la, inkhawl tâng tâng la, tripod tha law law lei ang che. Tripod hi i nupui ang hialin i ngai dawn nia. Khawvêla landscape thlalak nalh leh lâr tak tak ho hi tripod nêna lâk deuh vek a ni.
Aperture Priority Mode hi hmang thin rawh
Hê mode hi lansdcape photographer-ina an hman tam ber a ni a. I duh dâna i aperture i set tawh chuan a danglam tawh lo vang a, i thlalak exposure adjust turin shutter speed kha automatic-in a rawn in-adjust ve thung dawn a ni. Hei hi a tangkaina chu lens hman azirin thlalak depth of field duh ang thlapin a adjust theih a, depth of field adjust bâk chu buaipui vak tur a awm lo a ni. Landscape-a thil pawimawh deuh chu foreground, middle leh background te hi an ni, chû'ng pathum depth of field chu Aperture Priority Mode hian awlsam takin i adjust zung zung thei a ni. Background leh foreground fiah rual veka i duh chuan i lens aperture zîm theihna berah (f/22, f/36, etc.) han dah tawp mai la, i thlalak a sharp tha bawk ang. Landscape thlalak tam zawk hi chu aperture zîm lama lâk an ni deuh zel a.
Thlalak inchawih nalh dân (Composition)
Landscape photographer lâr tak takte thla lâk chîk taka i en thin chuan thil pathum pawimawh tak i hmuchhuak thei ang. Chû’ngte chu: Foreground, middle ground leh background te hi an ni. Thlalak inchawih nalh tur chuan hêng pathumte hi hman thiam a ngai em em a ni. Entirnan, Rih Dîl thlâ i la tâ a, foreground tel miah lovin tui atangin i la tan ta tlawng mai a, chû aia nalh chuan lâk dân awmin i hria a, i tawlh hnung deuh a, dîl kama thutthleng chu foreground atan hmangin i la tel ta a, dîl piah lama chhûm inzam nalh tak pawh chu background atan i hmang leh ta a, i thlalak chu a inchawih nalh ta em em mai a ni. I lâk tur i hmuh rual phatin i foreground tur pawh melh tel ve nghal thin ang che.
Tui Luang (Waterfalls)
Shutter speed muanga tui luang kan han lâka, inzawm pût ang emaw lapaw inphan ang deuha mâm tak emawa tui rawn lang hi silky tîin an sawi mai zêl. Kan sawi leh zêl naah pawh silky tiin kan sawi vê mai zêl tawh ang. Tuiluang thlâ hi chu silky taka lâk hi a nalh duh deuh ber mai a. Silky taka lâk dawn chuan shutter speed adjust a ngai a, shutter priority mode hi shutter speed adjust nân chuan a tha ber a ni. Shutter Priority Mode hi camera-ah chuan ‘S’ emaw ‘TV’ tîin emaw ziah a ni. Hemi mode-a i camera i set chuan i shutter speed duh thlan kha a inthlak ve tawh lo ang a, aperture-in i thlalak exposure rawn siam dik a tum dawn a ni. I shutter speed chu 1 second emaw a aia rei emawa i set loh chuan i tui luang lâk tur chu a silky zo meuh lo ang. Chhûn nisa hnuaiah chuan silky taka tui luang lâk hi a harsa em em a, a chhan chu shutter speed dah hniam a ngai si a, shutter speed a hniam chuan thlalakah êng a lût rei ang a, thlalak a êng lutuk dâwn a ni. Chuvangchuan, thla lâk hun tha ber kan sawi tawh kha i la hria ang a, khâ’ng hunah khân i lâk phawt chuan i duhthusama nalhin i la chhuak thei ang. Lens filter i hman chuan khaw êng hnuaiah pawh lâ la, tlem chuan thlalak êng lutuk tûr a tiziaawm deuh.
Mîina an la lâk ngai loh dânin lâk tum rawh
Mî lâk tawh anga khawi lai hmun lâr emaw i lâk vê leh ngawt zêl chuan i thlalakin mî mit a la vak lo ang. Hmun lâr te a nih phei chuan midangina an la lak ngai loh dân hmang i zawn chhuah thiam a ngai a ni. Entirnan, Vântawngkhawhthla thlalak kan hmuh rêng rêng hi Vantawngkhawhthla thlirna hmun an siam atanga lâk an ni deuh vek a, a râl lehlam atanga lâ leh la peih an awm lo. Chuvangchuan, Vantawngkhawhthla thlirna hmun an siam râl leh lamah harsa viau mahse va kal hram hram la, thlalak tha tak leh mit la tak i nei a ni mai dawn a ni. Mîina hnuai lam atang hlira an lâk thin kha nang chuan chunglam atangin han leh chiah la, thlalak tha tak i nei a ni leh mai.
Highlight Alerts hi hmang thin rawh
Camera azirin Highlight Alert hi a inziah dan a inang lo ve thin a, camera thenkhatah chuan Highlight Warning te pawh a inti ang. Highlight alert hian i thlalaka over-expose lai (spot) a awm chuan chû overexposed lai chu a rawn dum (black) bîk ang. Chumi rawn dum lai bik chuan a detail a hloh tihna a ni. Thlalaka overexposed a awm chuan a hnu leha edit/retouch a tiharsa zo vek thin. Highlight alert hi i lâk zawh hunah chauh i hmu thei a, i lâk zawh veleh i thlalak chu i enlêt ang a, chumi zawhah thlalak info (information) i en leh ang a, i thlalaka over-exposed lai chu a rawn lang kuar mai ang. Overexposed tihtlem i duh chuan shutter speed emaw aperture-in emaw exposure han tihniam leh phawt la, chumi zawhah i lak tur chu i han la leh chhin ang a, chumi hnuah highlight alert chu i en leh ang a, i duhthu a la sâm lo cheu a nih chuan i setting i tidanglam leh mai ang. Hightlight Alert hi i ON char char a nih chuan i thlalak sâ i enlet hunah hmuh a tihrehawm dawn a, i hman zawh veleh hian OFF leh nghal thin rawh.
I tripod hûnna tûr melh hmasa rawh
I thla lâkna tur chu khawi hmun pawh ni rawh se, a hmun i thlen veleha hmun bel lai bera i tripod i hûn nghal ngawt chuan a fuh lo vang. Mi fâte hi an thothâng a tha sî a, i kalna hmun kha uluk taka an lo lâk hnû a nih ring sâ nghal mai rawh. A hma lama kan sawi tawh ang khân mî la lâk ngai loh dân, mahse nalh êm êm sî-a lâk dân kawng a awm mial lo maw tiin i thluak kha buai map map rawh se. I lâk tur hmun i thlen veleh chuan a chhehvelah han tei kual fua fua la, i camera khan han tin vêl vang vang thîn la, angle tha tak chu i zawng chhuak em em ang. Chû hmun chu rualrem vak lo mahse, tripod hian ke thum (3) a nei tih hre reng la, chû’ng a ke thumte chu i duh ang thlapin i adjust thei tih i hre reng bawk dawn nia. Hahdam taka thawh chhuah hi zawng a hlu nêp deuh ngai.
Lens Filter hi neih hrâm tum rawh
Landscape photographer-te thlalak mawina thuruk pakhat chu polarizing filter hman hi a ni. Polarizing filter chuan thlalak colour a titak (saturated) a, êng zungina camera lens a rawn chhun lêt (reflection) avanga thlalak nalh lo tur a vêng bawk a ni. Landscape lâk nâna an han hman kher thin nachhan pawh hi chhûm leh ni êng lutuk a tihziaawm vang te leh van pâwl (vân dum pâwl tih ka han tum zet a, mahse a dum pâwl bawk si lo) te pawh a pawlna a belhchhah vâng te hi a ni. A duhtui lehzual ho hi chuan neutral density gradient filter hi an hmang thin a. Gradient filter a nih ang hian filter pawh a chanve chung lam a thim ruih (dark) a, a chanve hnuai lam chu a fim thung. Gradient filter hi vân lam a ên lutuk laia lei lam a thim ruih sî hunah an hmang thin.
Khaw tha hnuaiah chauh thlâ lâk tum suh
Khaw tha hnuaiah chauh thla lâk i tum a nih chuan hun tha tam tak i hlauh tihna a ni phawt. Mî tih peih loh kan tih hrâm hrâm peihna tak hi alawm vântlang chunga kan lên theihna chu. Lui tam zawk hi chu khaw khên lai leh khaw that vur lai hi chuan an kangchat thin a, chuvangchuan, thlalak tinalhtu tur ber tui a tam lai, fûr laia kan chhuah hi a tûl châng a awm. Fûr laia luite tui kawi ngiai nguaia nalh taka luang thin kha thâl lai leh khaw that lai chuan hmuh tur a lawi a awm tawh thin lo. Vangvat leh thosi leh ruah hlauh vângin thlalak tha tak tak leh mî mit la tak tak tur kan chân fo. A tui tak tak mî tan chuan ruah sur zawh hlima thing hnaha tui châmbâng ringawt pawh hi lâk fê tham a tling. Chubakah, ni zungina na taka a chhunna hnuaia thla lâk ai chuan ruah sur tur chhûm inmûngina khua a tihdur khuih hnuaia thla lak hi long exposure-a lâk i duh phei chuan a tha hlei hlei.
Lens
Landscape thlâ lâk nâ’na lens tangkai ber ni thei hial tur chu wide-angle lens hi a ni. Wide-angle lens hmang chuan hmun chêp takah pawh zâu takin i lâk tur ila thei ang. Nimahsela, i thlalak rêng rêng a wide êm êm vek zêl chuan a fuh fahran lo. Thlâ i lâk hmain i lâk tur chu wide taka lâk atana mawi leh mawi loh tur ngaihtuah hmasa la, i subject awmna a hlat lutuk phei chuan wide-angle lens hian tangkaina a nei lem lo vang. Thenkhat chuan panorama lâk nan wide-angle lens hi ka hmang e te an tia, an lak zawh hnuah panorama ruang-âm ang hian an crop mai thin a ni. Chutianga an lâk chuan bang awh khat hnawk khawpa lianin an thlalak chu print ta se a entlak mang loh vang. Nang chuan panorama lâk nan wide angle ni lovin zoom lens emaw prime lens emaw hmang daih zêl rawh. Post hmasaa Panorama lâk dân leh a siam dân hi chhiar la, i fiah kuar mai ang.
Tun tum chu a lem (sample photos/figure) ka dah tel ta lo mai, awlsam takin google-ah in search thei tho ang.
keini ang beginner tan chuan i thuziak hi a hlawkthlak thin khawp mai
ReplyDelete