Mamit Kawng Pawh A Mâm Vê Telh Telh E

Mamit Kawng Pawh A Mâm Vê Telh Telh E

Zinkawng

Ropuia Ralte

February 22, 2017

Mamitah hian nikum July thla laihawl aṭang khan ka awm a. District capital ve meuh chu a hmaa ka awmna khua Tuisenchhuah kawng te ai chuan a ṭha zawk turah ka lo ngai ve a. Mahse, a lo ṭha bik lo. Kawng sial lai a nih vângin a lo diak kawi nasa mai a. Bike khalh thiam ṭan chauh tân chuan zâm chhiat mai pawh a awl duh khawp mai.

Fûr khaw chêng kan pêl tawh a, ṭhâl khaw ro pawh kan pêl lek lek tawh. Chumi hun (season) hnih chhûng chuan Mamit kawngah hian hun ka hmang tawh a. Hahdam taka inkhalh thlen hi ka la nei lo. Fûr laiin a diak kawi em em a, kan tlu sek mai a. Ṭhâlah lah vaivut chhah lutuk avangin kan tlu leh tho tho. Mahse, fur lai ai chuan țhâl-ah zin a nuam deuh zawk hrim hrim.

Mamit kawng hi an laih ṭan kum ka hre lo va. Kawng sialtute hian Lengpui piah deuh aṭangin an lai ṭan a. Rawpuichhip lamah kawng hlui kha an zauh chho zêl a. Kawng kawi engemaw zât an tingil bawk a. Rawpuichhip khaw thlen hmain tlâk lamah a pêng tâ a. Hemi a penna aṭanga 6 km (ka bike odometer-ah) vêlah Rawpuichhip tlâk lamah tho a chhuak leh a ni. Kawng thar hian Rawpuichhip khaw chhung hi a khawi lam lamah pawh a hlat ang reng.

Lengpui leh Rawpuichhip inkara vut chhah zualna lai

Add caption

Rawpuichhip thlen hmaa an black top zawh tawh lai

Lengpui leh Rawpuichhip inkar. Black top tura lei an chhûn rual.

Rawpuichhip hêltu kawng hi an siamzo thawkhat tawh a. Kawng lakah black top hleih theih loh lai leh lung hmun an ker lai hmun hnih vêlah a la awm bawk. A bâk zawng hi chu an black top a. Mamit lam aṭanga Rawpuichhip luhna kawng a va pawh leh chiahna aṭanga Dapchhuah lam 1 km vêl hi la khawih loh, laih pawh la laih loh hrim hrim a ni a. Helai kawng tawite hi a chhe em em mai a, vut a chhah em avang hian tluk a awl em em a ni.

Vei lam hi Rawpuichhip panna kawng hlui. Dinglam hi kawng thar.

Hotel thara chaw ka ei lai 🍛

Rawpuichhip Hotel-te pawh kawng tharah an rawn insawnthla.

Hotel thar bula dawr

Helai kawng chhe tak kan pelh thlak hnu hian kawng thar a lo awm leh a. Tlâk lama kawng kal ṭhin kha chhuah lamah an kal tir ta thung a. Hei hi an black top fel vek tawh a, 5 km vel bawk a thui a ni. Kawng kawi ulh lutuk a awm lo va, a zâl nuam em em bawk. Hemi an black top hi kawng hlui nena a inpawhnaah chiah an titawp a ni. (A hnuaia thlalaka mi ang hian)

Vei lam khi Rawpuichhip luhna. Dinglam hi hemi kawng tharina a zawh zel tur.

Kawng chhiaah bawk tlan chhunzawm leh a ngai a. Black top thar ṭha taka han tlan par par hnua kawng chhe thlen chu thin hi a rin ṭûng mai a. Mahse, tunah chuan helai pawh hi an lai mek a, black top mai theih turin an peih fel nual tawh a ni. Helai an black top zawh tawh leh Dapchhuah inkara kawng chhia hi fur laia chirh chhah zual bikna lai a ni a, kawng a zim si a, a hlauhawm thei hle.

Kawng kawi êm êm mai kan va thleng phei a, kan tlan fê hnuah pawh kan chhak lawkah a hmaa kan tlanna kawng hla lo têah kan hmu thei a. Helai pawh hi ulh deuh hleka kawng sial chu pawi ti lo sela chuan pumpelh duai dân chu a awm hmêl. Mahse, kawng zâl na nâ nâ chu tlân a nuam bawk si a ni. Kawngkawi em em mai kan han tlan pelh hnu hian black top thar tak maiah kan tlan thla leh ngar ngar a. Kawng lakah an la zawhfel loh lai leh kawng hnuaia tui luanna an la siam zawh loh avanga black top hna la thawh theih lohna a awm nual thung a. Dapchhuah thlen hma hret thlengin an black top thla duai tawh a ni.

Dapchhuah thlen hmaa kawng an siam zawh tawh lai

Dapchhuah luh hma chiah

Dapchhuah Khua

Tut Lei, Dapchhuah

Dapchhuah luh dawn chiah hian Tut lei  thar a awm a, RCC-a dawh a ni. He lei thar hi nikum kum tawp lam aṭang khan kan zawh ṭan a. Lei hlui lam kha chu la ṭhiat chiah lo mahse zawh peih an awm tawh chuang lo. Dapchhuaha chawhmeh zuar ṭhinte pawh kha lei thar lamah hian an rawn insaw chho ve hlek a. A kal khât deuh tân chuan hawi â hû chu a awl ve deuh mai thei. :-)

Dampui aṭang hian a chhe chho ta em em mai a. Kawng a zîm a, kawi ulh a tam a,  a chho ulh em em mai bawk si a. Kawng laka motor lian han inpelh hi thil buaithlak tâwp a ni. Helai chho ka tlan lai hian motor lian khalhhovina motor lian lo kal ve an awm leh awm loh thu min zawh hi ka tawng nual tawh. Kawng zau deuh laia lo nghah law law mai an duh zawk ṭhin. Dampui han thlen hnu pawh hian kan la bir chho ngar ngar a. Dampui ngaw aṭangin a chhuk leh ta ngar ngar a ni. 

Dampui Ngaw tawntirh, ka chawlhna ṭhin.

Dampui Ngaw chhunga ramhuai hmu nî-a an insawi ṭhinna hmun.

Dampui ngaw hi ngaw chhah ṭha tak mai a ni a. Chhuna ka han tlan tlang hi chuan a tawntirh lamah hian Mamit ka thleng dawn hnai tawh tho tiin ka han ṭhu hahchawl ve ṭhin a. Mahse,  a ngaw dur chhungah tak hi chuan ka châwl peih vak lo va. An sawi hrâng ve thei bawk si a. Hlauh vang pawh ni lovin, rual pawl nân zawk tiin helai hi tlai thim dawn hnaiha ka thleng dawn chauh a nih chuan Mamit kal hi ka ṭhulh mai zel. Dampui ngaw piah lawk hi Luangpawl a ni tawh mai a. Luangpawl ka thlen hi chuan ka ving phei hluai tawh mai zel.

Tuna Aizawl leh Mamit inkara kawng chhe ber lai ni tâ chu Dapchhuah leh Mamit inkar hi a ni. Helai kawng hi an sawi dân chuan an repair hmêl tawh lem loh va. Dâmpui khaw hnuaiah hian tuna kawng thar hi a kal zêl ang a, Mamit khaw hrûlah a chhuak phei dawn a ni awm e. Chutiang a nih chuan tunah pawh hma an la la ṭan lo a ni a. Dampui leh Mamit inkar hi kum 5 chhung vêl tal chu kan la zawh a ngaih ka ring.

Mamit hi Aizawl aṭangin 100 km vel chauh a ni a. Ṭhal lai hian sumo hi darkar 5 vel an tlan tlangpui a (Aizawl-Mamit). Bike-a hmahmawh taka ka tlanin darkar 3 vel ka hmang a. Kawng hi ṭha tluan tawh se chuan Mamit kal nan hian sumo pawhin darkar 3 bak kan hman a rinawm loh. Tun aṭanga kum 5 velah chuan kan nghahhlelh em em kawng ṭhaah kan la lîm puat puat ang a. Hma kan sawn phah hle bawk ang a. Chesual pawh kan tam ang. Engpawh chu ni se, kawng chhe tak i rawn tlan pelh hnuah khaw nuam tak Mamit i rawn thleng hlawl ang a, i dam sawng sawng mai ang. 😉😊

Meter

AIZAWL

RAWPUICHHIP

DAPCHHUAH

Ropuia Ralte February 22, 2017