Camera kaihhnawih thumal hrang hrang hrilhfiahna
Definition Photography
Ka hmuh remchan chauh ka rawn hrilhfiah a, a kim lo hlê tih pawh ka hria. Mahse inzirtîr tana a tangkai beiseiin hêng thu lamtawi leh thumal hrilhfiahna hi ka rawn buatsaih a ni e. Ka hrilhfiah dan hi a fiah tawk lo tam tak pawh a awm ang. Internet-ah awlsam taka en theih vek a ni a, in lo inen chhunzawm zêl mai dawn nia.
A - Aperture : Lens chhûnga thlalak luhna kua. A zim chuan êng a luh tlem avangin a thim a,a focus area a zau bawk. Aperture a zau chuan êng a lût tam a, thim a ngam, focus erawh a zim thung.
AE - Automatic Exposure : Thlalak êng lutuk tur leh thim lutuk tur vêngtu.
AF - Automatic Focus : Lens-a focus adjust lova kan lâk tur lai(subject) automatic-a focus-tirtu.
AWB - Automatic White Balance : Thlalak rawng(temperature) tidanglamtû a ni deuh mai.
Bulb - 30 seconds aia rei shutter/aperture inhawng.
Burst Mode- “Continuous Mode” tih nen a inang reng a, inzawm zata thla lak a ni mai, hmehtlir tihna a nih mai chu.
Centre- Weighted - Thlalak frame laihâwla Automatic Exposure insawrbing.
CF - Compact Flash : Memory Card a ni a, 7D-ah hian CF hman a ni.
CA - Chromatic Aberration : Lens-ina color a hmuhfuh loh sawina a ni a. Thlalak thim(dark) lam deuhah a tlâng zai zai hi êng bikin a hual thin.
CR/CL - Camera Right / Camera Left
CMOS - Complementary Metal Oxide Semiconductor : Tangkaina tam tak a nei, thlalak mumal taka remkhawmtu a ni a,Battery a titlo bawk. Sawifiah kêlh lo mai ang.
CSC - Compact System Camera: Camera lens kaltlanga mitlâwnga en theihna kaw awmlo(mirrorless) a ni a, mahse lens erawh a thlak theih thung. Compact Digital camera kan tih ang hi a ni mai.
DOF or DoF- Depth of Field : Fiah taka thlalak focus huamchhung. Apperture kan tihzau chuan DoF a zim ang a, Apperture ka tihzau chuan DoF pawh a zau ang.
Dioptre - Camera bihna kaw bula herhna te tak tê, "-" leh "+" inziahna kha. Mahni mit mila herhrem(adjust)-na.
Digital Zoom- Camera lens-ina a zoom theih tawp baka camera lama lo zoom belh leh. Optical zoom-ah chuan a tawp thleng rât pawn zoom ila a fiah a, mahse Digital zoom kan hman tel chuan thlalak quality a tlahniam thei. Entirnan, 5x (5 times optical zoom) in digital camera-in i zoom thei a, digital zoom i hman tel chuan 10x thlengin i zoom thei ang.
DSLR - Digital Single Lens Reflex : Hei hi chu kan hre deuh vek ang. Lens thlâk theih leh lens kaltlanga thlalak kan bih theihna camera ho hi.
DX - Nikon brand bika APS-C sized image sensor sawina.
Exposure - Thlalak êng sawina. Over exposure kan tih chuan, thlalak ên lutuk thu kan sawi tihna a ni. Exposure hi Shutter speed leh Apperture hmanga thunun(control) theih a ni.
EV Compensation - Exposure compensation : Thlak tihên leh tihthimna lam.
F-Stop - Apperture zim lam leh zau lam. Entirnan, Canon EOS 1100D kit lens 18mm-55mm-a apperture zau ber chu F3.5 a ni a, a zîm theihna ber chu F22 a ni.
Firmware - Camera ROM-a camera hnathawhdan zawng zawng an khungkhawm hi. I camera firmware version kha a thar a rawn chhuah chuan i update thei. Mahse instructions chhiar vek hnuah i ti dawn nia. Battery hniam chunga update chi a ni lo bawk.
Fixed Apperture - Single apperture kan ti mai zelin ka hria, lens-a zoom pawha apperture danglam ve lo lens ho hi.
FF - Full Frame :
FPS/fps- Frame per second : Second khat chhunga a thlalak theih zât. Video-ah pawh hman tho a ni.
Focus Lock- I lâk duh-ah tak i focus chuan i lâk duh(object) kha che sawn mahse focus chuan automatic-in a zui/man char char tawh ang.
HDR - High Dynamic Range : Thlalak pakhata a thim ber leh a êng ber dahkawp tihna a ni deuh ber. Thlalak chu pathum pawh lo ni ta ang se, a ên dân indawtin kan lâ ang a, chûng chu thlalak pakhatah kan siam mai ang. Chutichuan, thlalaka a thim zual lai kha a lo êng ang a, a êng zual lai kha a lo thim deuh bawk ang a, inchawihnalh tawk chiahin a lo chhuak dawn a ni. HDR effect hi camera tha deuhah chuan an rawn dah tel thin.
IS - Image Stabilization : Lens-ah a bet a, hmeh tawlh tur tereuh tê a ni tlangpui. IS kan "on" chuan camera keng khur der der pawh ni ila thlalak kan en kha a tibuai vak lo ang. Zoom a sânin a tangkai. Lens model an ziah hian Image Stabilizer a awm chuan a tawpah "IS" tih hi an ziak tel thin
HD/ Full HD- High Definition : Movie-ah an hmang deuh bik.
HSM - Hypersonic Motor : Autofocus motor a ni a, Sigma lens-ah an hmang.
ISO/ASA - International Standards Organization / International Organization for
Standardization : ISO chu hetiang hian an thliar a :- 100,400,800,1600,3200,6400,12800,25600, etc. a number a sân poh leh thlalak a êng a, noise a tam telh telh bawk.
IQ - Image Quality
JPEG - Joint Photographic Experts Group : Thlalak reng reng hi JPEG file/format deuh vek an ni.
Landscape/portrait- Landcape chu thlalak frame a khamphei zawnga awm hi a ni a, ram thlalak sawi nan te pawh an hmang. Portrait chu thlalak frame a tung zawnga awm ve thung hi a ni, mihring/ransa thlalak sawi nan an hmang bawk.
LCD - Liquid Crystal Display : camera hmaia thlalak kan hmuh theihna leh live view mode hmanga kan en theihna hi.
LED - Light Emitting Diode
Lens Filter - Lens hmâwra lens vênhim nana darthlalang pan tak vuah belh chi. Flare awm turte pawh a vêng.
L or L Lens- Luxury: Canon lens tha chungchuang ho sawina
Megapixel - Thlalak fiah lam leh len lam(resolution) tehkhawng a ni. Thlalak resolution chu 2590 x 1920 a nih chuan 5 megapixel tihna a ni. Megapixel hi lens-ah a bet emaw ti kan awm leh thin a, camera body-ah zawk a bet tih hriat tur.
Metering - Thlalak a êng pekrual dan tur lo chawk chhuak zung zungtu leh kan lak duhlai bik thlurbingna a ni. Matrix metering te, Spot metering te, Centre weighted metering te leh metering dangte a awm.
MF - Manual Focus :Lens atanga focus herhmil.
Noise - Thlalak tibaltu leh tifiah lo tura mûr sin tê tê lo awm thin hi. ISO tihsanin noise a tam duh.
Optical Viewfinder - Camera-a thlalak tur mita entlangna kua hi a ni.
Panorama - Sei pût-a thla lak a ni ber ang chu. Entirnan, Aizawl thlâ hi i la duh a, vawi khat hmeh-ah a dung(length) a leng vek si lo, vawi thum vel i hmet a, chu chu i zawm sei ta a, a pumin a lo lang thei ta a ni. Panorama hi camera thenkhatah chuan 360 degree a zaua lâk theih nghalna an rawn bilh tel thin.
RAW - Thla kan lak reng reng hian automatic-in camera hian thlalak chu a a mawi thei ang ber turin a lo tidanglam nghal thin a, noise a tam chuan a paih then a, colour a tlem chuan a titam bawk a, a len lutukin a titê bawk a. Mahse RAW-a kan lak chuan camera khân a lo tidanglam ve tawh lo a, a nihna ang angin a save tawp a, a colour pawh mit lawnga kan hmuh ang mai hi a ni thin. Chu chu JPEG file-in a in-save ve lo a,raw file-in a in-save thin. RAW file chu computer-ah pawh image viewer pangngaia en nghal theih a ni lo va, JPEG-a convert tê tê a ngai. A convert nan hian Adobe DNG Converter te leh converter tam tak hman tur a awm. Professional photographer ho hian RAW-a lak hi an uar hlê bawk, a sawisak leh a nawm avangin.
Red-Eye - Thlalak thenkhatah hi chuan mihring mit hi a tlêt avangin aniang chu, mit nautê hi a sen leh vât thin a. Chu chu red-eye an ti. Camera thenkhatah chuan Red-Eye tihreh nan hian red-Eye Reduction a awm thin.
Saturation - Thlalaka rawng lâr lam sawina a ni. Saturation kan pêk tam chuan thlalak-ah colour a tam anga, kan pêk tlem chuan, Black & White ang deuh thuak pawhin a chhuak thei.
SSM - Supersonic Wave Motor : Minolta, Konica Minolta leh Sony lens bika autofocus sawina.
SWM - Silent Wave Motor : Nikon lens-a autofocus ri zawi sawina.
TTL - Through The Lens
USM - Ultrasonic Motor : Canon Lens-a autofocus tha chungchuang ho.
UV - Ultraviolet
VR - Vibration Reduction : Nikon lens-a Image Stabilizer.
Wide Angle- Wide Angle Lens sawifiah nghal mai ang. Thlalak huam chhung zau zawng a ni mai a. Lens zoom hi "mm"-in an teh a, i dinna ngai rengah ding la, 50mm-a zaua i lak theih kha 15mm-a i lak leh chuan a huamchhung zau hek hawk tawh viau ang. Wide Angle lens leh Fisheye lens hi inangkhat deuh reng a ni a, mahse fisheye hi chu "wide" lehzual sawi nan an hmang deuh, 8mm ang te hi.