Ngaihtuahna

Ngaihtuahna

Article

Ropuia Ralte

May 25, 2013

Photo Courtesy: Lifehacker

    Hê khawvêlah hian eng vânga lo piang chhuak nge ka nih. Eng ti tura lo piang ve ngawt nge ka nih. Lo piang ve ta lo law law ila a ṭha zawk lo maw. Ngaihtuah dawn chuan ngaihtuah neuh neuh tûr hi a lo va intiang nasa êr ûr tak êm. Kan lo pian chhuah vê tâk sî-ah chuan hmabâk leh chanvo pawimawh tak chu kan nei tihna a ni phawt ang.

    Kan dam chhûng rei zawng hi han chhût vê teh. Ho lam deuhva chhût liam puat chuan kum sawmriat dam chu dam rei tak an ni. Mahse, chatuan rei tûrzia han ngaihtuah leh teh, chatuan nêna tehkhin chuan kum sawmriat chuan mitkhap kâr pawh a tluk pha lo nasâ ang. Chumi mitkhap kâr pawh tlinglovah chuan mahni kan inthunun zo chuang bawk si lo. Bible hi han keu ila hê khawvela kan awm chhunga kan nun dan tur a inziak kûr duah mai a. Kan lo pian chhuah vê tawh si chuan thâmral mai mai kan lo in-ui laklawh tawh a, kan thlarau hamthatna kan lo ngaihtuah lo thei si lo. Chû kawng dik, Bible-in min hrilh lawm lawm chu zâwm famkim thei lah kan awm hek lo. Chuti a nih sî chuan hê khawvêla kan lo pian chhuahna hi dân zawm famkim khirh tak avang hian  malsawmnaa pawm thei kan awm dwn em ni?

    Hlimna lo thleng sê, lungngaihnain a hmâwr a bâwk leh a. Hlimna pawh chu anchhia a va ni thei mai awm vê. Hmangaihna pawh hi a lo awm tak tak rêng emaw chû(?). A lo awm vê tâ a nih pawhin hmangaihna tluantling a awm theiin ka ring lo. Nimahsela, chutih lai chuan Bible-ah hmangaihna hrilhfiahna a awm bawk sî a. Chû hmangaihna dân dik zawh famkim chu kan awm leh kher chuang lovang. Kan tleirawl lai hian hmangaihtu dik tawng vê tâ emaw lo inti pawh ni ila, hmangaihna awmzia kan hrethawi feih chauh a ni ang a, chû kan hriatthawi vê mai chauh pawh chu kan damchhûng hun chanve chhûng pawh kan nunpui zo si lo. Chûngte avang chuan hê hun tawitê hi hrehawmna leh ṭahna nên kan vuiliam leh ṭhin.

    Mut hmuna anchhe dawng khawvêl leh a ken tel mihring vânduai chanchin ngaihtuaha zân rei tak tak thleng men hi sim duh teh mah ila harsatna hian chu ngaihtuahna chu a rawn kaitho leh ṭhin.

    (Nizan ka muhil theilo chu ka ât khat a chêng a, hê thû hi ka type ta vak a. Awmzia pawh a nei tak tak kher lo vang)

Ropuia Ralte May 25, 2013