Home Article Computer Language Settings Mizo Alphabet leh letter 'Ṭ'

Mizo Alphabet leh letter 'Ṭ'

Mizo Alphabet leh letter 'Ṭ'

Mizo alphabet siam kum leh a siamtute ka hre mai lo va, engpawh chu ni se alphabet min siamsaktute kha an chhuanawm hle a ni. Mahse, kan alphabet-ah hian kan hman ngai lêm loh letter hnih a awm a, G leh J hi an ni. Hê letter hnih hi hmang vak lo mah ila hnam hming ziah nân kan hmang ṭhin a, a bikin Mizoram hmar lamah hian an hmang nasa deuh bikin ka hria. Kan alphabet-a a tel miau sî avang hian G leh J hmanna thumal hi mizo ṭawng dik lo a tih ngawt theih bik loh. Mahse, kan alphabet-ah hian lo tel lo law law sê tih châng chu ka nei ṭhin. (Mizo Language - Wikipedia)


Chhim thlang lama khaw pakhat Tuisenchhuaha ka awm lai khân primary school bulah hian ka chêng a. An alphabet inzirtir rî hi ka lo ngaithla reng ṭhin. A, AW, B, CH, D, E, F, G an han tizo chiaha NG an han lam hi eng ti ve ta lo hian en-jee tî hian an lam ri ta ṭhin a, ka lo ngaimawh ṭhin khawp mai a. Vawi khat chu an alphabet zirtirtu pâ bulah chuan ka sawi tâ a, NG hi eng ti lova en-jee tî-a in lam ri dawn a nih chuan CH pawh hi sî-eich emaw sî-eih-chhi, tîin lam ri ve tho r'û ka ti a. An zirtirtu pâ-in a sawi dân chuan, "Kan naupan lai aṭanga kan lo zir ve dân tho a ni a, hei hi chu chhim lama kan tih dân a niang chu ka ti mai, in lam ṭhin dân ang hian an lam ri ṭhin tih reng reng ka lo hre lo", a ti a. Ka thu erawh chu a zâwm ta chuang lo va. A tûk aṭang bawk chuan an en-jee leh ta dual dual tho va. 😠

Chhim lam han sawi tâkah chuan Aizawl lama an fiamthu sawi ṭhin, "Chhim lamah chuan Table Tennis te hi Ṭêble Ṭennis an ti ṭâlh mai a ni", an tih hi a lo dik tlat mai a (chhimah an ti Ṭ vek e, ka tihna chu a ni chuang lo). Tuisenchhuah-ah khan vawi khat chu Table Tennis khelhpui tur hian min rawn sâwm a, chuta ṭang chuan english thumal-ah hi chuan T reng reng hi chu an ti Ṭ deuh zêl mai tih ka hre tâ a. Committee pawh hi commiṭṭî an ti mai. Tlabunga ka kal ṭum pawhin kan sumo chuanpui pakhat hian kawng kama teak tam a tih thû a rawn sawi a. Kei chuan ka lo tui-hnih a, heti hian sawi ta law law la ka ti a, "Hêng lai vêl chu Ṭeak ṭhing ṭuai ṭe ṭak ṭê ṭê a ṭam ṭak ṭak", tiin, mahse, a nui lo, ka inthiam lo ve viau a ni.

Chhim lam chu lo kal san tâ ila. Mizo kan ni a, kan alphabet hi chu mizo hnam awm chhûng hi chuan kan hman reng a rinawm tawh a. Chuvangchuan, kan alphabet-a "Ṭ" hi kan hlamchhiah thiang ngawt lo. Ṭ hmanna tura T han hman zêl mai pawh hi a fuh lo va, mizo ṭawng chhiar a harsat phah ṭhin. "Kan khaw mipui kan ṭâm", tih tura, "Kan khaw mipui kan tam", tî-a kan type chuan a kawh a dang daih thei. Chuvang tak chuan, kan thil chhut (type)-ah hian Ṭ hi a hmanna turah chuan a dikin hmang thei ila, T hnuaia chhut han ngat hi hmang zel ila, mizo ṭawng chhiar a nawm phah êm êm dawn a ni.

Mizoram nî tin chanchinbû hlunah te hi chuan an thuziah-ah reng reng hian an tisual palh te a nih loh chuan Ṭ aiah T an hmang tawh ngai lo va. Vanglaini phei chuan an website-ah pawh Ṭ hi an hmang thlap thlap tawh a ni. A dika hmang duh sî, mahse a tih dân hre si lo a awm theih a, chû'ngte tân chuan hawrawp kan type dâwna mizo alphabet-a Ṭ/ṭ hman dân hi kan sawi dâwn a ni. Ṭ mai bakah hian mizo alphabet-a vowels (a,e,i,u)-a thlûkna dah dân pawh kan sawi tel nghal ang.



A hmasa berah chuan Microsoft Keyboard Layout Creator hmanga keyboard ka siam danglam MizoFont hi download a ngai.

DOWNLOAD

(243 kb)

I download zawhah .rar file khi i unzip/extract ang a, chumi zawh-ah i unzipped folder chhungah khan a hnuai berah setup.exe tih a lo awm ang a, chumi chu i click ang a, i install ang.

I install zawh fel hnuah i windows taskbar ding lamah a hnuaia mi ang khuan ENG US tih i hmu ang. I install a zawhfel hnu pawha a la rawn lang lo a nih chuan i computer i restart ang a, a rawn lang ve mai ang. A rawn lan tawh chuan, i click ang a, "MizoFont" tih zawk hi i thlang leh ang.

Windows 10-a a lan dân

MizoFont i hmanlai hian square bracket ([ ]) te hi i hmang duh mai thei a, chutiang hunah chuan taskbar aṭang khian US Keyboard-ah i dah let leh zeuh mai ang.

MizoFont Keyboard hman dan:



Character Name Keyboard
Ṭ T with dot below ]
ṭ small letter T with dot below [
Ț Capital letter T with comma below |
ț Small letter T with comma below \
₹ Indian Rupee symbol `

Type chhinna tûr:  

A chunga table ka târlan aṭang hian keyboard hman dân tur chu a hriatthiam theih mai ka ring. Mahse Ṭ leh ₹ chauh khi chuan mizo alphabet a la famkim bik lo va. Mizo alphabet vowels-a thlûkna (circumflex) dah dân hi kan hriat leh a ṭha a ni. MizoFont keyboard-ah hian vowels pawh hi a thlûkna a dah tel theih tho va, mahse, vowels dah kim tur chuan keyboard-a character hman ṭhan loh ho pawh hian a daih dawn si lo va, chuvangchuan character shortcut kan hman mai a ngai dawn a ni. Character shortcut key pangngai hi kan hre bel thei a nih chuan keyboard khawih danglam hman ai chuan a ṭha zawk bawk, a chhan chu eng font pawh hmang la, thlûkna hi a awm thei vek dawn a ni.

Mizo Vowels Thlûkna Shortcut:


Character Name Keyboard
 capital letter A with circumflex Alt + 0194
â small letter A with circumflex Alt + 131
Ê capital letter E with circumflex Alt + 0202
ê small letter E with circumflex Alt + 136
Î capital letter I with circumflex Alt + 0206
î small letter I with circumflex Alt + 140
Û capital letter U with circumflex Alt + 0219
û small letter U with circumflex Alt + 150

Type chhinna tûr: 
 


MizoFont-a Ṭ leh ṭ hi font font tam zawkah chuan a hman theih loh mai theih a. Ṭ (Latin small letter T with dot below) keng tel font hman a ngai. Ț (Latin letter T with comma below) hi chu eng font-ah pawh hian a hman theih vek a, chuvangchuan, Ṭ support ve lo font hman duh hunah a ṭangkai ringin ka dah tel ve a ni. Ṭ (Latin small letter T with dot below) keng tel font langsâr zual deuhte ka han târlang ang e:

  1. Arial
  2. Cabin
  3. Calibri
  4. Cambria
  5. Lato
  6. Open Sans
  7. Segoe UI
  8. Times New Roman
  9. etc
(i fonts neihho-ah khan han test ve la, i font-in a support leh support loh chu awlsam deuhin i hre thei ang)

Hê keyboard ka siam hi chanchinbû-ah te kan hman fo ṭhin VNT Times te nen hian a kalphung a inang lo va, hê font hi chuan a huang zau zawk a ni. VNT font te hi chu web-ah a hman ve theih loh va. Blog te, website te leh facebook-ah te Ṭ hi a dik takin i hmang thlap thlap duh a nih chuan hemi keyboard hi i hman a ngai ang. Hriat fiah loh leh zawh belh duh i neih chuan comment lamah khuan min lo zâwt mai dawn nia aw. Hê post hi i hlawkpui ngei ka beisei 😉.


Related Posts
On.

33 comments

  1. Aldrin Zothan MawiaDecember 13, 2017 1:01 am

    A va tha ve. Mahse ka'n ti teh ang. Khimi app khi hmang pawh ni ila, hmun danga an install ve loh chuan a thlukna kan hmanna ho zawng hi midang pc ah chuan buai ve thei bawk sia, thil tam tham deuh hlek ah chuan a buaithlak ang em? Siam that zung zung a har tawh si a. A hnuaia 'Mizo vowels thlukna shortcut' i rawn dah ah thian "tri" a awm si lo a, engtia tih tur nge i sawifiah thei ang em? Ka hmang thiam lo tlat mai symbol ho khi

    ReplyDelete
    Replies
    1. Ropuia RalteDecember 13, 2017 6:12 am

      A thlukna khi chu khawi computer ah pawh a hman theih vek, ka siam chawp khi install hranpa a ngai lo. Ṭ hi i hman duh chuan khimi i install zeuh ang a, taskbar hnuailam dinglamah khan keyboard lem te tak te a lo awm ang a, tah chuan MIZO i thlang ang. Ṭ hi hmang pawh ni la, computer dangah pawh a Ṭ vek tho ang 😁

      Delete
  2. Hmeltha Damrei HoFebruary 01, 2018 2:17 pm

    Ka zawn ka hmu ta. 😀😀

    ReplyDelete
  3. Lehkhabu KhâwvelMarch 26, 2018 7:33 pm

    Mizo Fond i dah chu ka tangkaipui hle mai. Ka download hnuah ka install nghal a, awlsam takin ṭ leh Ṭ ka hmang nghal thei a, ka lehkha ziah tawh sa ah ka han dah zar zar mai a, zing lam dar 2 ka thleng der mai. A thlukna (Circumflex) erawh hi chu ka computer keyboard-in a support loh vang nge ni ka hmang thei der lo mai. Hei pawh hi hman theih dan awm se chuan ka lawm ngawt ang.

    ReplyDelete
    Replies
    1. Ropuia RalteMarch 26, 2018 8:11 pm

      A va lawmawm ve aw...

      Circumflex pawh hi windows-ah chuan theih vek tur chu a ni. Alt+131 ka tih hian + hi hmeh tel a ngai lo aw, Alt leh 131 hmeh kawp tur tihna. Han try leh chhin teh

      Delete
    2. Lehkhabu KhâwvelMarch 29, 2018 7:52 pm

      ALT+ leh Code i ziahte hi ka hman kim vek a, ka keyboard-in a support lo a ni ber mai. CTRL + ALT nen ka hman kawp chhun a, Â Ê Î Û tiin a rawn lang thei a; mahse, Small letter tur chuan a theih leh lawi si lo a ni. Engpawhnise, ka hman tangkai theih apiang chu lawm takin ka lo hmang zel phawt ang...

      Delete
    3. Ropuia RalteMarch 29, 2018 8:29 pm

      I windows version update a ngai pawh a ni mai thei.
      Engpawhnise, kaw lawm reng reng e :-)

      Delete
  4. RobertMarch 29, 2019 5:30 pm

    Mizo font i siam hi PageMaker ah ka hmang ve thei tlat lo mai.. :)

    ReplyDelete
  5. Reuben HmarApril 02, 2019 12:16 pm

    Keipawh Pagemaker ah ka hmang thei lo tlat mai.. eng nge chhan ni ang aw.. Mahse a dang ah chuan a tha vek e...MS-Word ah ka chhu phot .. Pagemaker ah ka copy lut leh mai thin.. hahhah

    ReplyDelete
  6. UnknownJune 10, 2019 5:17 pm

    Ka install a,mahse a hnuaia us, mizo font tih vel a ka tibo daih mai, eng tia han tih chi nge?

    ReplyDelete
  7. UnknownAugust 08, 2019 8:54 am

    Khawngaihin i contact no min pe thei em? Mamawhna a sang e 9612038852 maruat

    ReplyDelete
  8. AnonymousOctober 12, 2019 4:09 pm

    A ṭhain a va hlu em! Hei hi kan la hmang ṭangkai dawn chauh niin a lang. In thawk ropui lutuk e.

    ReplyDelete
  9. Ropuia RalteDecember 07, 2019 3:42 pm

    @David Hriata Chawnghlut, Ka lawm lutuk e :-)

    ReplyDelete
  10. UnknownJune 09, 2020 12:30 am

    a va ṭha kher em... ka ṭangkaipui hle mai

    ReplyDelete
  11. UnknownAugust 22, 2020 10:03 pm

    A tha khawp mai, mahse Pagemaker 7 ah ka hmang thei tlat lo mai.

    ReplyDelete
    Replies
    1. Ropuia RalteAugust 20, 2021 12:19 pm

      Pagemaker hi update awm tawh miah lo a ni a. Adobe tho hian pagemaker thlak nan Adobe Indesign an siam a. A changtlung zawk a, a changkang daih zawk bawk a, hman a nuam a, thil tih theih a tam bawk a. Pagemaker thlak nan hian hmang daih thei vek ila a zia ngawt ang.

      Delete
  12. Zohmaa TochhawngSeptember 09, 2020 6:52 pm

    A ṭha hle mai. I zârah Kindle-ah Ṭ leh ṭ ka hmang thei dâwn ta! Ṭ atân | leh ṭ atân \ kan lo hman ṭhan deuh tawh avâng erawh chuan fîmkhur a ngai deuh dawn a nih hi.

    ReplyDelete
  13. UnknownFebruary 23, 2021 8:12 pm

    ka ti thei ve miah lo

    ReplyDelete
    Replies
    1. Ropuia RalteJuly 03, 2021 5:50 pm

      A va mak ve. Windows hman a hlui deuh tawh a ni lo maw

      Delete
  14. ZoramiFebruary 13, 2022 2:50 pm

    Ṭangkai hlei mai

    ReplyDelete
  15. hirconMspecraApril 24, 2022 6:19 pm

    hirconMspecra Dana Head https://wakelet.com/wake/ZeT-uGVLzZVweJa-770fR
    tawarmidisch

    ReplyDelete
  16. RichardSeptember 06, 2022 6:09 pm

    A tha hle mai, ka hmang tangkai dawn lutuk

    ReplyDelete
  17. permuPdigbuDecember 01, 2022 8:47 am

    permuPdigbu Sam Taylor Best
    Awesome
    moordmodasam

    ReplyDelete
  18. David Lalramenga February 28, 2023 5:56 pm

    NG chungchangah hian ka lo comment ve lawk, chhim lam mi tan chuan 'NG' tih na na na 'Eng' tiha lam tlat chu a har ve deuh, NG chu Eng iti anih chuan. Nghakliana tih hi lam dawn ta la Enghakliana alo ni dawn tihna a ni. Mizo in rawng Eng kan nei a chu Eng chu E leh NG belh khawm alphabet in a a siam an ni, chu chu Mizo in Eng kan neih a ni a, tuman rawng Eng an ziah in NG(eng- acc. to Hmar) tih ringawt an ziak ngai lo, NG erawh NG tiha lam mai tur a ni.

    ReplyDelete
    Replies
    1. Ropuia RalteMarch 13, 2023 7:34 am

      "CH" pawh "si-eich" in ti awm chuang si lo va. "L" pawh "El" tiin kan lam a, Liana hming ziah dawnin "Eliana" a nih phah chuah lo :-D . Letter/alphabet lam dan ang zelin kan thil ziahah a ri chhuak chuang lo ania.

      Delete
  19. AnonymousFebruary 08, 2024 11:47 am

    Download dawna payment tihna hi a va buaithlak ve

    ReplyDelete