√ Kum 2014 Thlirletna

Kum 2014 Thlirletna

December 31, 2014

2014-a ni chhuak hnuhnung ber chu a ngui nghuai mai a. Kum tluana ka thil tih tha lo leh ka lungngaihna zawng zawng te kha min tawmpui ve ni hmiang ka ti mai. Chu chuan ka rilru-ah hun liam tâa ka nuna ka thil tawn tam tak a rawn inlartir zut zut mai a. Kumina ka nuna thil thleng chhinchhiahtlakte hi ka blog lam tala ka ziah ve loh chuan hriat reng theih lohvin a la thâm ral mai mai âwm si a. Kut hlei thil tih mai mai niawm takin ka han thai puat puat ang e.

Kumin hi a ral meuh chuan ka blog pawhin a kum rukna a hmang mek dawn tihna a ni. Blog hi ka siam ve nual tawh a, nimahsela, han enkawl chhunzawm tak tak tur chuan taimaknain a tlin thin lo va. Blog-a post tur ai mah chuan blog template design hi nuam ka ti zawk thin a. Chhiar tlak awm tak tak lo hian ka chhuah leh thin. A changin wordpress lamah ka insawn a, a chang leh blogger-ah hian ka let leh a. Tuna ka blog hi ka enkawl rei theih ber chu a ni ta mai. Mahse, hê blog pawh hi mumal taka post ka siamna chu a la rei teh chiam lo. 2014 a rawn inher chhuah meuh chuan mahni chanchin ringawt post ai chuan midang tana tangkai thei tur post ve tawh duhna rilru ka pu ta a. vawiin thlengin photography chanchin ka la ziak ta ngat ngat a ni. Photography lama tuimi ka thian ten min hlutsak thiam a vangin ka lawm thin khawp mai.

Photographer thiam tak ni âwm ziazangin website te ka han siam a, dot com domain chu a to deuh ka tih avangin dot in domain ka hmang a, www.ropuiaphotography.in ka siam ve a. Photography-a ka hun tam zawk ka pêk theih tak tlat loh avang hian rei ka rial thei kher lo mai thei. Ka website hi ka lo titawp leh ta daih a nih pawhin blog ka nei tho alawm maw leee :-)

January atanga October thla chhung zawng hi chuan Football thlâ ka la deuh char char a. Nikum atang tawh khan MPL Official Photographer-in ka awm a, chu chu ka la chhunzawm ta reng a ni. MPL khelh khaihlak lai hian Football Match hrang hrang a awm a, MFA hnuaia football leh a kaihhnawiha thlalak a tulna hmunah chuan ka hun ka hmang chawt mai thin a ni. ZoFooty website-a Photoblog page enkawl turin min ruat chho bawk a. Football thlalak chu khêl lovin ka photoblog-ah ka dah ta zel a. Mahni tawka buaina tham tih tur hi chu ka kovah a tla ve reng. Football thla ka lak chhung zawnga ka thian tha tak tak te, MFA hruaitute leh MPL club hrang hranga ka thiante kha ka chungah an tha em em a, an chungah lawmthu sawi ka va ba nasa em. Nimahsela, nuam ka tih ber, thlalak chu ka bansan a ngai ta tlat mai a. Ngai tak chungin October-ah MPL Official Photographer hna chu ka bansan ta.

October thla a rawn inher chhuak a. Kum 2011-2012 chhunga Health Worker hna ka lo zir ve kha hman tangkai hun a rawn thleng ta a. Health worker 50 lai an la dawn tih thu ka hriat chuan dilna lehkha ka theh lut ve a. Interview-ah ka tling ve ta hlauh mai. Pathian zarah hnâ ka hmu chu a lo ni ve ta reng mai a. November ni 6-ah ka hnathawhna tur hmun Tuisenchhuah chu ka thleng ta hlawl mai. A va khawharthlak duh kher teh reng em. Thla khat pumhlum chiah chiah ka awm a, chumi hnuah December-ah Christmas hmang turin ka haw ve ta a. Aizawl han thlen chuan nula tituai nalh tak tak an lo kat nuk a. Nula hrim hrim hi chu ka hmu tha vur vek mai hian ka inhria :-).

Kum 2014 chu ka mangtha a lo ngai dawn der mai a. Malsawmtu kum nge anchhe lawhtu kum tih pawh ngaihtuah tham a awm. Nimahsela Pathian zarah harsatna lak atanga hlimna khaw eng hmachhawn theih turin huaisenna leh tumruhna ka nei ve zel a. Vawiin thlengin Pathianin hrisel tak leh natna khirhkhan tawk miah lovin min hruai a. Hei aia malsawmna nasa hi a awm chuangin ka ring lo. Kum 2015-ah pawh Pathianin min kaihruai leh ang a. Midang tana malsawmna ni thei tura a hmanruaa min hman ngei ka ring a. Hrehawmna leh beidawnna ruama ka tluk luh pawha min kai tho zel turin ka va beisei em. Kum 2015 hi malsawmna ni lul teh se.

Vawiina ka chhuah vahnaa ka tawnte: